LAOAG CITY – Inpasingked ni Mrs. Rowena Guillermo, ti Market Supervisor iti San Nicolas Public Market a personal a bumisita ni Mayor Mike Hernando iti nasao a merkado publiko tapno kitaen ti mairekreklamo a narugit ken nabangsit a kanal.
Segun kenkuana, addan ti dua a lawas ti napalabas sipod dimmanon kadakuada ti nasao a reklamo manipod kadagiti mismo aglaklako iti tiendaan.
Nupay kasta, inlawlawagna a saanda pay laeng a dagus a makagaraw gapu ta manarimaan ti pannakaaramid ti drainage canal iti nasao a merkado publiko.
Inbatadna a malaksid iti Local Chief Executive ket adda pay ni Municipal Engineer a mangkita iti nasao a kanal tapno makita a naimbag no ania ti rumbeng nga aramidenda tapno masolbar ti nabayagen a parikot dagiti adda iti tiendaan.
Kunana nga apaman a mapagnunumoan dagiti nasken nga addang nga aramiden ti lokal a gobierno ket dagusda nga isayangkat ti pannakadalus ti kanal nangruna ket nagbalayan daytoyen dagiti rugit.
Kabayatanna, mangnamnama dagiti market vendors iti San Nicolas Public Market nga insigida a madalusan ti nasao a kanal tapno saan a maaryek dagiti mapan gumatang kadakuada banag a dakkel nga epekto daytoy iti panaglakoda.
Immuna iti daytoy, adda ti naawat nga impormasion ti News Team ti Bombo Radyo Laoag nga arig agig-igges payen ti nadakamat a kanal gapu iti kinarugit ken kinabangsit daytoyen.
