LAOAG CITY – Nagballigi ti Nasudi Chorale iti Mariano Marcos State University (MMSU) iti 13th World Choir Games Open Competition a naisayangkat idiay Auckland, New Zealand.
Basar iti pannaki-uman ti Bombo Radyo Laoag ken ni Mr. Vince Louisse Salacup, Conductor ti Nasudi Chorale, daytoy ket kalpasan a nagun-odda ti Golden Diploma Level IV iti Sacred Choral Music Acapella Category ken Golden Diploma Level I babaen iti Youth Choir Category.
Segun kenkuana, nagbalin a naiget ti labanda gapu ta adda iti sumurok 300 a choirs manipud kadagiti nagduduma a pagilian ti nakipaset iti naindaklan a kompetision.
Inbatadna a ti sacred category ket talloda ti nagbibinnalubal pakairamanan ti Miriam College High School Glee Club ken maysa a choir group manipud idiay Uruguay idinto iti youth category ket nakabinnalubalda dagiti pito a maibilang a multi-awarded choirs iti intero a lubong.
Inlawlawagna a ti kangrunaan a nagbalin a pannubokda ket ti saan nga agsisinnabat ti orasda para iti panagsanayda gapu kadagiti nagduduma a pakakumikumanda iti panagadal ken no dadduma ket kasapulanda pay ti ag-overtime.
Kunana a saanda a ninamnama a maiyawidda ti balligi gapu ta walo a bulan pay laeng ti grupoda sipod nabukel daytoy ken damoda a makibinnalubal iti international competition.
Innayonna a ti Nasudi Chorale iti Mariano Marcos State University ket isu ti maibilang a Premiere College Choir iti intero nga unibersidad.
Kabayatanna, naammoan a ti World Choir Games Open Competition ket maiyarig kas Olympics ti kadakkelna nga event.
