LAOAG CITY – Nasurok a 1.1 milyon a nutribun ti naibunungen ti Office of the Vice President (OVP) kadagiti napili a pagadalan nga addaan ti nangato nga insidente ti malnutrisyon kadagiti ubbing sipud idi Mayo 2023 agingga iti Abril 2024.
Iti accomplishment report ti Office of the Vice President, adda ti pakabuklan a 1,182,892 buns ti naibunong iti 14,472 nga estudyante a benepisyaryo ti “Pansarap Program.”
Target ti Pansarap Program ti Office of the Vice President nutritional supplementation program dagiti estudyante a nadeterminar kas “severely wasted.”
Maiyataday daytoy iti inisyatibo iti Philippine Plan of Action for Nutrition (PPAN) guidelines ken agpaot iti 120 nga aldaw tapno masigurado ti nutritional support para kadagiti maseknan nga ubbing.
Kabayatanna, nabenepisyaran pay ti 119,234 nga indibidwal ken 30,120 a pamilya manipod kadagiti medical assistance ken burial assistance programs ti Office of the Vice President.
Nairanud met iti Libreng Sakay Program ti Office of the Vice President ti 1,000,682 a commuters.
Adda ti pakabuklan a 205,692 a pamilya ti nagbalin a benepisyaryo ti relief operations ti Office of the Vice President.
