LAOAG CITY – Addan ti pakabuklan a P13,712,700 a pisos ti naipaay kadagiti mannalon, mangngalap pakairamanan dagiti Barangay Ranger Officers ditoy probinsia.
Daytoy ket babaen iti programa ti Provincial Agriculture Office, Sustainable Development Center ken iti Environment and Natural Resources Office.
Naammoan nga umabot iti 3 a milyon dua gasut walopulo ket dua a ribu a pisos ti naipaay a fuel subsidy para iti 110 a mannalonno a sadinno a naipaayan ti 20 a litro ti krudo ti tunggal maysa, duapulo a gunglo dagiti mangngalap ti naipaayan met ti uppat a pulo a litro ken tallo ribu a pisos ti balor na a krudo ti naipaay iti tunggal maysa kadagiti sangaribu ken uppat a mannalon nga agmulmula ti tabako.
Malaksid kadagiti nadakamat a mannalon ket adda pay dagiti naipaayan iti agricultural inputs a pakairamanan ti tallo nga hand tractor, walo gasut lima-pulo a sako ti inorganic nga abono, sangagasut a pedaso ti “drying nets” wenno pagbilagan ken pito a plastic cooler nga agdagup iti walo a milyon walo gasut uppat a pulo ket innem a ribu lima gasut a pisos idinto a ti dagup ti sueldo dagiti Barangay Ranger Officers ket maysa a milyon lima gasut walopulo ket uppat a ribu dua gasut a pisos.
Inpakaammo ni Gob. Cecilia Araneta Marcos a naggapo amin ti pundo kadagitoy a tulong manipud iti gobierno probinsyal ken inpanamnama na nga agtultuloy ti panagkiddaw da ken ni Bise Gob. Matthew Marcos Manotoc ti maipaay a nayun a tulong manipud kadagiti nagduduma nga ahensia ti gobierno nasional.
Inlawlawag na a daytoy ket gapu ta adda ti panagdanagda iti mapaspasaran a krisis iti agdama gapu iti kinangina ti presyo dagiti produkto a petrolyo gubuay ti mapaspasamak a gubat idiay middle east.
Inbunannag ti gobernador nga adda pay dagiti tulong a naggapo iti Bureau of Fisheries and Aquatic Resources a fuel subsidy para iti sanga gasut innem a pulo ket Siyam a mangngalap a naipaayan ti tallo ribu a pisos ti balor na a krudo para iti tunggal maysa idinto nga adda pay dagiti naipaay a tuna handline para iti sabali pay a sanga gasut a mangngalap.
Kabayatanna, inpadanon ni Bise Gob. Matthew Marcos Manotoc ti panagyaman na iti panangitultuloy ni Gob. Marcos kadagiti programa a mangipapaay ti tulong kadagiti mannalon, mangngalap ken produkto.
