LAOAG CITY – Inburay ni Mr. Rogelio Colobong dagiti kapadasanna iti panagnegosio iti panag-lechon ti baboy.
Segun kenkuana, adu a rigat ken sakripisio ti nagdalanna sakbay a nagun-od iti kinas am-it iti panagballigina iti panagbiag.
Inbatadna nga idi damona iti panag-lechon ti baboy ket arig natamnay ti taray ti negosioda kalpasan nga adu dagiti kustomer ti makagura kenkuana gapu ta saan pay a naluto a nasayaat dagiti lechon nga in-order-da kadakuada.
Nupay kasta, inlawlawagna nga iti panagtulid ti panawen ket in-inot a naalana ti templa ti panagluto ken panag-lechon ti baboy.
Gapu iti daytoy, kunana nga immadu dagiti kustomerda agingga a nakaalada metten dagiti suki a kanayon a gumatgatang kadakuada.
Mainaig iti daytoy, inpakaammona a sakbay a nasursurona ti panag-lechon ket napadasanna met ti nagpasada iti tricycle ken nag-buy and sell.
Innayonna a babaen daytoy a negosio ket isu ti nangsupusop kadagiti amin a paggastoanda iti inaldaw-aldaw a panagbiagda ken napagturposna dagiti innem nga annakna.
Kabayatanna, naammoan nga addan ti sumurok 20 a tawenen sipod idi rinugian ni Colobong ti negosio a panag-lechon.
