LAOAG CITY – Nalawag para ken ni House Deputy Minority Leader ken ACT Teachers Party-list Rep. Antonio Tinio a ti pannakadutok ken ni Davao City Mayor Baste Duterte kas Presidente ti Partido Demokratiko Pilipino (PDP) ket “Plan B” para iti 2028 presidential elections.
Inpetteng ni Tinio, daytoy ket kas panagsagsagana ti Duterte no bilang naan-anay a ma-impeach agingga iti Senado ni Vice President Sara Duterte a basar iti 1987 Constitution ket adda ti perpetual disqualification iti aniaman a posision iti gobierno pakairamanan ti panangipawil iti panagkandidato para iti Presidente.
Dinakamatna a malaksid iti inaramid a Presidente ti Partido Demokratiko Pilipino ni Mayor Baste, ket adda pay ti binukel a coalition a Reform Alliance for Good Governance and Accountability tapno ikkan ti national platform ti maysa pay a Duterte.
Para ken ni Tinio, dagiti nadakamat nga addang ket mangipakpakita a madandanagan ti kampo dagiti Duterte gapu ta dakkel ti posibilidad nga agtultuloy ti conviction iti Senate Impeachment Court kontra ken ni Vice President Sara Duterte.
