LAOAG CITY – Inlawlawag ni Engr. Matias Malenab, ti District Engineer iti Department of Public Works and Highways (DPWH) 2nd Engineering District ditoy probinsya dagiti naidanun a reklamo ditoy Bombo Radyo Laoag.
Daytoy ket mainaig iti pannakatubtubtub dagiti napintas paylaeng a kalsada iti maikadwa a distrito.
Segun kenkuana, paset ti naindaklan a proyekto ti DPWH ita a tawen ti pannakasukat amin a kalsada nga addaan ti 23 a sentimetro a kabengbeng no sadinno a mapagbalin a 28 a sentimetro.
Immun-una iti daytoy, masdaaw dagiti residente iti Barangay Santiago iti ili ti Solsona no apay a matubtubtub dagiti kalsada iti lugar a naaramid paylaeng idi 1970s ken 1980s idinto nga awan pulos ti perdi wenno rikki na.
Malaksid iti ili ti Solsona, kastoy met ti reklamo dagiti makakitkita iti pannakatubtubtub ti kalsada iti paset ti Batac-Paoay Road babaen kadagiti contractor ti DPWH.
Inpakaammo pay ni Malenab a no kitkitaen dagiti nasao a kalsada ket arigna awan pulos ti depekto na ngem no ma-evaluate ket makita dagiti dadael da isut gapuna a nasken laengen a masukatan.
