LAOAG CITY – Awan ti papel ti opisina ni Presidente Ferdinand Marcos Jr. iti maikapat nga impeachment complaint a naipila kontra ken ni Vice-President Sara Duterte.
Iti press conference ni Presidente Marcos iti Kalayaan Hall, iti Palasyo ti Malakanyang, inpetteng na a nalidem a makibiang ti Malakanyang iti nasao nga isyu gapu ta constitutional mandate ti Kongreso a mangituloy ti impeachment complaints.
Nupay kasta, inadmitir ni Presidente Marcos a trinatar na ti isyu kadagiti agpanpanday linteg a pakairamanan ni Speaker Ferdinand Martin Romualdez.
Mainaig iti daytoy, nagkomento met ni Presidente Marcos seknan iti isyu a ti anak na a ni Ilocos Norte Representative Ferdinand Alexander ”Sandro” Marcos ti nangidaulo iti panagpirma iti pannaka-impeach ni Vice President Duterte.
Inpalgak ti presidente a binalakadan na laeng ti anak na nga iti kanito a maipila ti impeachment complaint ket masapol a suruten da ti proseso ken aramiden na ti trabaho kas maysa nga agpanpanday linteg.
Mainaig iti daytoy, kuna ti presidente a nakadepende iti Senado no kasanu da nga imanihir ti nasao nga isyu.
