LAOAG CITY – Inpaganetget ni Presidente Ferdinand R. Marcos Jr. iti National Task Force to End Communist Armed Conflict (NTF-ELCAC) a masapul nga agtultuloy ti determinasion ken panagkaykaysa iti mandato da a mangpasardeng ti Communist insurgency maiyataday iti gagem ti gobierno a mapagtalinaed ti kapia ken panagdur-as ti pagilian.
Iti linaon ti speech ti Presidente nga inbasa ni Special Assistant to the President Antonio Ernesto Lagdameo Jr., apaman ti makanem nga anibersario ti National Task Force to End Communist Armed Conflict iti Camp Aguinaldo, dinayaw ni Marcos ti anti-insurgency body ti gobierno gapu iti saan nga agkupas a panagreggetda a mangtaming kadagiti namunganayan ti insurgency ken mangbangon manen kadagiti komunidad a naapektaran iti panagdadangadang.
Kunana a masapul ti pannakipagpaset dagiti stakeholder ken papigsaen ti partnership kadagiti nagduduma a sektor iti laksid dagiti sangsangwen a pangta ti pagilyan iti nailyan a seguridad.
Innayonna a ti National Task Force to End Communist Armed Conflict, ket nabukel iti babaen dagiti ganuat a mangbalbaliw iti kasasaad maipapan ti saan a panagtitinnunos ken kinaranggas.
Malaksid iti daytoy, kinablaawan pay ti Presidente dagiti Gawad Parangal Awardees gapu ta dakkel ti naitulong ti dedikasion ken serbisioda kadagiti gannuat a mangpabileg iti kappia, panangitampok ti panagtitinnulong dagiti ahensia ti gobierno, pribado nga indibidual, institusion, ken ti sapasap a publiko iti pananggun-od kadagiti napateg a milestone iti pananglaban ti insurgency.
Binigbig na pay ti nagbalin a balligi dagiti nagduduma a convergence programs kas iti Barangay Development Program (BDP), Enhanced Comprehensive Local Integration Program (E-CLIP), ken ti agtultuloy a programa ti amnestia iti pannakaitandudo ti socio-economic conditions dagiti vulnerable communities.
Kagiddan iti daytoy, inpaganetget ni Marcos ti kinapateg ti seguridad ken ti adaptation kadagiti pangta iti seguridad ti pagilian.
Kabayatanna, mangnamnama ti Presidente nga agbalin nga inspirasyon ti publiko ti makanem nga anibersario ti National Task Force to End Communist Armed Conflict gapu ta daytoy ti agbalin a wagas tapno naan-anay a magun-od ti kappia ken talna iti masakbayan.
