LAOAG CITY – Awan ti panagbabawi ni Presidente Ferdinand Marcos Jr. iti nagbalin a tandem-da ni Vice President Sara Duterte iti napalabas nga eleksion.
Daytoy ti inlawlawag ti Malacañang kalpasan a dimmawat ti panagpadispensar ni Vice President Sara iti publiko gapu ta sinuportaranna ti kandidatura ni Presidente Marcos a kunana a mabalin a nakaapektar iti manarimaan a kasasaad ti pagilian.
Inbatad ni Palace Press Officer ken Presidential Communications Office Usec. Claire Castro, saan a ninamnama ti Presidente ti pannakadadael ti alyansada.
Kunana nga inadmitir ti Presidente a nakigtot isuna iti nagbalin a tignay ti Bise Presidente pakairamanan ti kinaawan ti pannakikammayet ken dagiti rakurak kontra iti administrasion.
Nupay kasta, inpetteng ti Palasyo a nagtalinaed a nakatutok ni Presidente Marcos iti trabahona ken iti panangidaulo ti pagilian.
Innayonna nga awan ti kontrol ti Presidente no saan a makikaykaysa wenno tumulong ti Bise Presidente kadagiti programa ti gobierno.
