LAOAG CITY – Inbilin ni Philippine National Police (PNP) chief Gen. Rommel Francisco Marbil ti deployment ti amin nga available a pulis ken resources tapno matulungan dagiti indibidwal a kangrunaan a naapektaran ti bagyo Carina.
Inaramid daytoy ni Marbil kalpasan ti direktiba ni Presidente Ferdinand Marcos Jr. para iti dagus a pannakaipaay ti tulong kadagiti indibidwal nga apektado ti bagyo Carina iti nagduduma a rehiyon iti baet dagiti nalawa a layos.
Inpasingked ni Marbil a nagiwaras da ti umdas a bilang dagiti pulis ken mobility assets tapno tulungan ti local government units iti nagduduma a disaster responses karaman ti panagibakwit.
Ginasut a pamilya ti naireport a naibakwit gapu iti nalawa a layos iti nagduduma a paset ti pagilian, pakairamanan ti Metro Manila.
