LAOAG CITY – Inrakurak ni Presidente Ferdinand R. Marcos Jr. a ti pondo manipod kadagiti nakanselar a proyekto iti flood control para iti tawen 2026 ket maikabil kadagiti prayoridad a sektor kas ti edukasyon, salun-at, agrikultura, pabahay, imprastruktura, Information and Communication Technology, labor, social services, ken energy, kagiddaw ti panangipaay na ti nalawag a “menu” ti pakausaran tapno agserbi a pagibasaran dagiti agpanpanday linteg.
Inbatad ni Presidente Marcos nga addan ti nalawag a “menu” tapno masigurado a naurnus ken usto ti pakailatangan ti pondo.
Inlawlawag pay ni Presidente Marcos a ti nasao a “menu” ket agserbi a pagibasaran dagiti agpanpanday linteg iti panagaramid kadagiti panagbalbaliw ti pondo.
Innayon na a daytoy ket umuna laeng nga addang maiturong iti nalawlawag a transparency ken pagsungsungbatan iti panangilatang ti pondo ti gobierno kalpasan dagiti isyu a rimuar iti kallabes mainaig iti iregularidad iti panaggastos kadagiti proyekto a pang-imprastruktura.
Nupay awan ti baro a pondo a mailatang para iti flood control projects iti national budget para iti 2026, inlawlawag ni Marcos a ti P350 bilyon a nailatang para iti 2025 ket masapol a mausar paylaeng a buo sakbay nga agaramid kadagiti baro nga addang.
Ti kanselasyon ti flood control projects ken ti panagsagsagana ti maysa a prayoridad nga spending plan ket kalpasan ti panangbukel ti presidente iti Independent Commission for Infrastructure (ICI) a mangtutuk iti imbestigasyon kadagiti maanomalya a flood control projects iti napalabas a 10 a tawen.
