LAOAG CITY – Naka-schedule nga agbiyahe ni Presidente Ferdinand Marcos Jr. idiay India para iti lima nga aldaw nga State Visit manipod Agosto 4 agingga iti 8 ita a tawen.
Daytoy ket basar iti imbitasyon ni Indian Prime Minister Narendra Modi.
Segun iti Presidential Communications Office, makitaripnong ni Presidente Marcos kadagiti lider ti India iti New Delhi, ken agturong pay iti Bangalore para iti serye ti business engagements tapno papigsaen ti relasyon ti dua a pagilian iti trade ken ekonomiya.
Makipagkita pay ni President Marcos iti Filipino community iti New Delhi kas paset ti opisyal nga schedule na.
Daytoy ti kaunaan nga State Visit ti maysa a Philippine President iti India manipod idi October 2007, nga ibibisita idi ni dati a Presidente Gloria Macapagal-Arroyo.
Naudi met a bimmisita iti Pilipinas ti maysa nga Indian head of state idi October 2019, iti babaen ni dati nga Indian President Ram Nath Kovind.
Mainaig iti panagbisita, selebraran ita a tawen ti Pilipinas ken India ti maika-75 nga anibersaryo ti diplomatic relations ti dua a pagilian.
