LAOAG CITY – Inpasigurado ti Department of Energy ti pannakaipatungpal ti price freeze kadagiti produkto nga LPG a mailaklako kadagiti lugar a naipan iti State of Calamity (SOC) gapu iti iduduprak ti Supertyphoon Julian.
Basar iti Department of Energy, otomatiko a maipakat ti price freeze kadagiti lugar a nangideklara ti State of Calamity gapu iti kalamidad.
Kayatna a saoen, nasken a saan nga aggaraw ti presio ti LPG kadagiti nasao a lugar iti uneg ti 15 nga aldaw manipud iti pannakaideklara ti State of Calamity.
Sakupen daytoy dagiti LPG nga adda ti kadagsenna nga 11kgs agpababa wenno dagiti limitado nga us-usaren dagiti household pakairamanan dagiti nagduduma a kerosene products.
Iti agdama, naideklara ti State of Calamity iti probinsia ti Batanes ken ditoy Ilocos Norte gubuay iti Bagyo Julian.
Immunan a nangideklara ti State of Calamity ti Ilocos Norte idi Oktubre 1 isu nga agpaot ti price freeze agingga inton Oktubre 15 idinto nga idi Oktubre 2 ket nangideklara metten ti Batanes ti State of Calamity isu nga agpaot ti price freeze agingga inton Oktubre 16.
Kabayatanna, dagiti nadakamat a probinsa, maipawil ti panagngato ti presio dagiti LPG ken kerosene products iti baet nga adda ti price increase nga ipatpatungpal dagiti petroleum companies.
