LAOAG CITY – Madanagan dagiti pribado nga ospital nga ad-adda a saan a mabayadan ti PhilHealth gapu iti kinaawan ti pundo.
Segun ken ni Dr. Alan Taylan, ti St. Camillus De Lellis Hospital ditoy siudad ti Laoag, dakkel ti epektona daytoy kadagiti government hospital nga adda iti babaen ti PhilHealth.
Inbatadna a maamakda no ania ti agbalin a situasion no kasano a bayadan ti gobierno ti Philhealth kadagiti pribado nga ospital nangruna ket datin a maitantantan ti bayad ti government health insurer uray idi dakkel pay ti pundo daytoy.
Inlawlawagna a ti pagam-amkanda ket no bilang naan-anay a maibos ti agdama a pundo a pangbayad sakbayda a makakolektar.
Maipalagip a saan a nailinged dagiti sumagmamano a private hospitals ti panagamakda no bilang saan a mabayadan isuda ti Philhealth gapu iti zero subsidy budget daytoy para inton 2025.
Immuna iti daytoy, mabalin nga agresulta iti panagrikep dagiti sumagmamano a babassit nga ospital gapu ta ingkapilitanda met a mangipaay ti sueld kadagiti agpapaay kadakuada malaksid pay iti operational expenses kadagiti pasilidadda.
