LAOAG CITY – Inalay-ayan ni Dr. Rickson Balalio, mangidadaulo ti Provincial Health Office ti panagamak ti publiko mainaig iti monkeypox.
Daytoy ket kalpasan nga adda dagiti damag a ngimmato ti bilang dagiti makapkaptan ti nasao a virus kadagiti dadduma a pagilian.
Nupay kasta, inbatadna a masapul ti naan-anay latta a panagan-annad ken obserbaren dagiti health protocols a maipatpatungpal tapno maliklikan ti nasao a sakit.
Mainaig iti daytoy, inpasigurado ni Dr. Balalio a saan pay daytoy a maibilang a health concern ditoy probinsia gapu ta saan met nga immadu ti kaso ti monkeypox ditoy probinsia.
Inlawlawagna a no bilang adda manen ti mapasaran a pandemia ket inpasingkedna a nakasagana ti probinsia maipapan iti daytoy.
Innayonna nga adda ti napintas nga epidemiology and surveillance unit a mausar tapno tamingen dagiti agbalin a pasiente.
