LAOAG CITY – Pinasingkedan ni Engr. Pedro “Pete” Agcaoili Jr., Provincial Planning and Development Officer ti Provincial Government of Ilocos Norte nga adda ti naipasdek a solar panel iti kapitolio probinsial.
Inlawlawagna a kasapulan ti electrical engineer a mangkita iti daytoy a seknan iti pannakausarna.
Imbatadna a naggapo ti pondo iti National Electrification Administration nga inpatungpal ti Ilocos Norte Electric Cooperative a nangipasdek dagiti solar.
Immun-una ngem iti daytoy, inpakaammo ni Mr. Cipriano “Perry” Martinez, Acting General Manager ti Ilocos Norte Electric Cooperative a naggapo ti pondo ken ni Sen. Imee Marcos babaen iti National Electrification Administration.
Impalgakna a basar ti plano a pannakaipalawa ti kapitolio, maaddaan daytoy ti “solarization project” rason a sakbay pay a simrek ti National Electrification Administration ket addan dagiti pribado a kompania a naki-inuman ken ni Gob. Matthew Marcos Manotoc.
Kabayantanna, maraksakan ti Gobernador gapu ta napili ti probinsya ti National Electrification Administration a pangipasdekan kadagiti Solar Energy Project.
Kunanaobligado met ti electrical engineer a mangmonitor no mabalin a maipatungpal ti net metering tapno no inkaso nga agsobra ti mapataud a kuryente ket mabalin a mailako iti Ilocos Norte Electric Cooperative.
Segun kenkuana, saan a masigurado no karaman daytoy iti ordinansa ti probinsia gapu ta addaan dagiti maiyasping a gakat a maap-aprobaran iti Sang. Panlalawigan.
Kamaudianna, mangnamnama ni Agcaoili a maisaruno a maikkan ti Solar Panel ti Dap-ayan Commercial Center ken ti Ferdinand Edralin Marcos Stadium agsipud ta maysa daytoy kadagiti karaman iti plano a maiyestablisaran ti Solar Energy Project.
