LAOAG CITY – Kinumpirmaran ni Mrs. Helen Domingo, ti mangidadaulo ti Provincial Sports and Development Office a matuloy met laeng ti pannakausar ti Ilocos Norte Centennial Arena para iti pannakaiyuswat ti Mr. and Ms. Laoag 2024 kas paset ti pannakaselebrar ti Pamulinawen Festival ditoy siudad ti Laoag.
Segun kenkuana, addan ti napagnunumoan da Mayor Michael Marcos Keon and Gov. Matthew Marcos Mantoc pakaseknan iti daytoy a banag no sadino ket masapol nga adda ti maestablisar a temporario a backstage ken Comfort Room a mausar para kadagiti makipaset iti nasao a pasalip.
Inbatadna a babaen iti daytoy ket maituloy a maiyuswat ti beauty pageant iti nadakamat a venue.
Inlawlawagna nga adda metten dagiti ramit a masapol para iti pannakapasayaat ti Ilocos Norte Centennial Arena.
Innayonna a mangnamnama dagiti dua nga opisial a malpas ti pannakatarimaan ti nasao a pasdek iti kabiitan a panawen.
