LAOAG CITY – Paimbestigaren ni House Assistant Majority Leader ken Lanao del Sur Representative Zia Alonto Adiong iti National Bureau of Investigation (NBI) ti rakurak ni dati a Presidente Rodrigo Duterte a panangpatay iti 15 a Senador tapno makatugaw iti puesto dagiti kandidatoda.
Inbatad ni Adiong a nasken a kitaen ti National Bureau of Investigation ti rakurak ti dati a Presidente kas ti panangimbestigarda iti panangpangta ti anak daytoy a ni Vice President Sara Duterte kada Presidente Ferdinand Bongbong Marcos Jr., First Lady Liza Araneta-Marcos ken Speaker Ferdinand Martin Romualdez.
Inpetteng ni Adiong, iti maysa a demokratiko a pagilian ket adda ti bileg ti sarita nangruna no aggapu daytoy iti dati a kangatoan a lider ti pagilian.
Inlawlawagna a masapol a saan nga iyaleng-aleng dagiti nagbalin a rakurak ni dati a Presidente Duterte.
Innayonna a no adda ti bomb joke a naiget a maikanniwas iti paglintegan ket adda ti maiyannatop a pannusa ket ad-adda a saan a nasken a palabsen ti pangta iti panangpapatay kadagiti 15 a Senador.
