LAOAG CITY – Inpetteng ni Retired Justice Oswaldo Agcaioili, tubo iti ili ti San Nicolas ken kinaubingan ni Chief Justice Diosdado Peralta a saan nga arogante no diket nasingpet ken nalaing a makipagayam.
Segun kenni Agcaioili, awan ti maibaga na a madi kenni Peralta gapo ta sipud pay idi ket mabigbigbig a nalaing ken hard working.
Inlawlawag a dagitoy dagiti mabalin a rason no apay nga isuna ti nadutukan kas chief justice ti Korte Suprema, ken eskperto daytoy iti criminal law.
Kunana a nupay saan na pay a personal a nakablaawan ti maysa kadagiti nasinged a pagayam na a ni Peralta ket mangnamnama nga agkita da tapno maipadanon na met ti kinaragsak na nagun-od ni Peralta.
Kabayatanna, linagip pay ni Agcaioili nga isuna ti nagbalin a rangtay tapno agam-ammo ti chief justice ken ti asawa na a ni Court of Appeals (CA) Associate Justice Fernanda Lampas Peralta.
