LAOAG CITY – Inlawlawag ni Mrs. Perlita Cabello, ti Officer in Charge ti City Social Welfare and Development Office (CSWDO) ditoy ciudad ti Laoag a saan a maibilang a child labor dagiti ubbing nga aglaklako iti kalsada no kadwa da dagiti nagannak da gapu ta normal laeng nga agsapol dagitoy.
Inlawlawag na a ti makuna a child labor ket no saaan a kadwa dagiti uibbing dagiti nagannak da.
Nupay kasta, inbatad ni Cabello a nu dadduma ket adda ti rason nu apay nga agsakripisyo nga aglako dagiti ubbing ngem saan a maibilang a panangirurumen daytoy dagiti nagannak.
Mainaig iti daytoy, inpalgak na a ditoy ciudad ti Laoag ket regular ti panagbisita da kadagiti lugar a masansan a pagpwestoan dagiti ubbing nga aglaklako ti sampaguita tapnu matulungan dagitoy ngem adda dagiti gudaway nga itarayan ida dagiti maseknan.
Kabayatanna, inpakaammo ni Cabello nga addan dagiti natulungan da nga ubbing no sadinno nga insubli da met laeng dagitoy iti pamilya da kalpasan a nakita da a dakkel a nagbaliwan ti estado ti panagbiagda babaen iti tulong nga inpaay ti opisina da.
Nupay kasta, saan a maliklikan nga adda latta kadagiti maseknan ti agsubli nga aglako kangrunaan na no saan latta nga agsardeng ti panagsikog ken panagpasngay ti ina da.
Maipalagip a basar iti datos ti Philippine Statistic Authority (PSA), ti child labor ket maysa kadagiti dakkel nga isyu ditoy pagilyan gapu ta minilyon dagiti ubbing nga agtrabtrabaho gapu iti kinarigat ti panagbiag ken kaadda dagiti irresponsable a nagannak.
