LAOAG CITY – Dakkel ti epekto na kadagiti commuters ti saan a panagkikinnaawatan dagiti tricycle drivers iti ili ti San Nicolas ken ditoy ciudad ti Laoag.
Daytoy ket kalpasan nga inpakaammo ti maysa a tricycle driver a nabigbig laeng iti nagan na a “Jeff” a mapawilan da a sumrek a mapan agitulnog ti pasahero iti ili ti San Nicolas.
Kuna na nga agpatingga da laeng iti boundary iti ili ti San Nicolas ken ditoy ciudad ti Laoag.
Innayon na nga immuna a napawilan da a mapan agitulnog ti pasahero da iti ili ti San Nicolas no sadinno a naticketan pay ti maysa a kadwa da.
Gapu iti daytoy, masapol a kastoy met ti mapasamak no adda ti pasahero manipod iti ili ti San Nicolas nga agturong ditoy ciudad ti Laoag.
Inpakaammo na a gapu iti kastoy a mapaspasamak ket kapilitan nga isardeng da laeng dagiti pasahero da iti boundary ti San Nicolas ken ciudad ti Laoag kalpasan na ket aglugan da iti tricyle iti nasao nga ili nga isu ti mapan mangitulnog kadakuada iti destinasyon da.
Mainaig iti daytoy, inbaga iti Bombo Radyo Laoag ni Police Major Joseph Baltazar, ti chief of police iti ili ti San Nicolas a maipagarop nga immuna a pinawilan dagiti traysikelan ditoy ciudad ti Laoag dagiti tricycle manipod iti ili ti San Nicolas a mapan agitulnog ti pasahero na ditoy ciudad.
