LAOAG CITY – Saan a ti panagangkat ti bagas ti solusion iti panangipababa ti presio ti bagas ditoy Pilipinas.
Daytoy ti inpakaammo ni Ms. Cathy Estabillo, Secretary ti Bantay Bigas kageddan ti pannakaselebrar ti World Food Day.
Segun kenkuana, nasken nga ipangpangruna ni Pres. Ferdinand Bongbong Marcos Jr. iti industria iti benneg ti agrikultura.
Inbatadna iti naunday a panawen nga agang-angkat ti bagas ti pagilian ket saan pay a bimmaba ti presio ti bagas.
Inpalgakna a nakababain nga iti napalabas a tallo a tawen ket maibilang ti Pilipinas kas numero uno a rice importer iti intero a lubong iti baet a maibilang a tropical country ti pagilian.
Kunana a rumbeng a tulungan ti gobierno dagiti mannalon kadagiti kasapulanda iti panagmula ken panagapit tapno maliklikan nga umutang pay dagitoy.
Mainaig iti daytoy, inlawlawag ni Estabillo a ti 29 a pisos iti kada kilo nga adda kadagiti Kadiwa Center ket saan a solusion gapu ta limitado laeng dagiti gumatgatang.
Inpettengna a dagiti agdama nga isaysayangkat a programa ti gobierno ket band-aid solution laeng gapu iti agtultuloy a panagadu ti bilang dagiti mabisbisin iti intero a pagilian.
Maipalagip nga inrakurak ti Social Weather Stations (SWS), maysa a non-commissioned survey para iti maikatlo a kwarter ti 2024 ti panagngato ti involuntary hunger kadagiti pamilia a Pilipino maidasig iti maikadua a kwarter.
Immuna iti daytoy, basar iti resulta a naiparuk-at a survey, adda ti 22.9% ti pamilia a Pilipino ti naipadamag a nakapasar ti involuntary hunger wenno dagiti awan ti makanda uray maminsan a daras iti napalabas a tallo a bulan.
