LAOAG CITY – Binilin ti Sandiganbayan ti Office of the Ombudsman a solbaren iti uneg ti 60 nga aldaw ti mosyon ni dati a Senador Bong Revilla Jr., nga ibabawi ti reklamo a graft ken malversation of public funds a naipila kontra kenkuana.
Naamoan a dagiti kaso ket adda ti pakainaigan iti ghost flood control project iti Pandi, Bulacan nga agbalor ti P92.8 million.
Pinalubusan ti Sandiganbayan 3rd Division ti apela ni Revilla ken dati a Department of Public Works and Highways (DPWH) Bulacan Office Accountant Juanito Mendoza a makaipila ti motion for reconsideration iti Ombudsman.
Inbatad met ni Assistant Ombudsman Mico Clavano nga agtungpal da iti pammilin ti anti-graft court ken solbaren ti panel of prosecutors ti mosyon da Revilla ken Mendoza.
Nupay kasta, agtalek ni Clavano a napigsa ti kaso kontra kada Revilla ken Mendoza, maibasar iti naiget a panangtingiting dagiti imbestigador.
