LAOAG CITY – Kinanselar ti gobierno lokal iti ili ti Pagudpud ti panagselebrar da ti Kangayedan Festival ita a tawen.
Segun ken ni Mayor Rafael Benemerito, ti nasao nga addang ket napagnunumoan da nga opisyal iti ili ti Pagudpud kas paset ti pannakipagrikna da kadagiti tourism stakeholders iti nadakamat nga ili.
Daytoy ket kalpasan nga ado dagiti turista a nangkanselar ti ibibisita da iti ili ti Pagudpud gapu iti dakkel a nagngatoan ti presyo dagiti produkto a petrolyo.
Inbatad ti mayor a ti pondo nga usaren da koma para iti selebrasyon ti fiesta da ket itulong da laengen kadagitinaapektaran a tourism stakeholders a naapektaran ti oil crisis gapu iti epekto ti agtultuloy a tension iti Middle East.
Immunan nga inrakurak ni Mr. Hendrick Pedronan, ti mangidadaulo iti Municipal Disaster Risk Reduction and Management Office iti ili ti Pagudpud nga ado dagiti turista a nangkanselar ti bookings na iti nasao nga ili iti napalabas a Semana Santa.
Segun pay ken ni Pedronan, arigna awan pay ti 20 a porsiento dagiti turista a nagturong iti ili ti Pagudpud ita a idi semana santa no ikompara ti bilang dagiti nagturong iti isu metlaeng a panawen idi 2025.
