LAOAG CITY – Ginutigot ni Senador Sherwin Gatchalian ti Department of Energy (DOE) a tutukan ti pannakaipasdek dagiti sumagmamano nga energy generation projects iti pannakaipatungpal ti sistema ti Energy Virtual One-Stop Shop (EVOSS) tapno makatulong a maipasigurado nga umdas ti suplay ken maipababa ti singir iti kuriente.
Inbatad ni Gatchalian a gagem ti Energy Virtual One-Stop Shop a maiproseso dagus ti amin nga aplikasion iti aniaman a proyekto nga adda ti pakainaiganna iti enerhia.
Nagatendar dagiti sumagmamano nga energy official iti panagdengngeg ti Senado iti inlungalong a pundo ti ahensia para iti 2025.
Kuna ni Gatchalian, Vice-Chair ti Senate Committee on Energy nga adda ti pakabuklan a 263 a milyon a pisos ti nailatang para iti Energy Virtual One-Stop Shop manipud idi 2019 nga adda ti kanayonan a P36 a milyon a pundo a naikiddaw para iti 2025.
