LAOAG CITY – Inbilang ni Senador Ronald ‘Bato’ dela Rosa nga awan serserbina ti imbestigasion ti Kamara iti “war on drugs” ti dati nga administrasion ni Duterte.
Segun ken ni Dela Rosa, sayang laeng ti panawen a panangiwayat iti imbestigasion ti Kamara gapu ta agsubli-subli dagiti saludsod ken sungbat iti daytoy nga isyu.
Kinarit pay ti Senador dagiti maseknan a mangipila iti kaso kontra kadakuada no adda umdas nga ebidensia.
Kabayatanna, patien ti mammanday-linteg a “politically motivated” ti panangbiag manen ti Kamara iti imbestigasion seknan iti war on drugs ti administrasion ni Duterte.
Inbatad na nga adda dagiti mayat a “ma-pin down” ken imaneg ti dati a Presidente Rodrigo Duterte, nangruna kadagiti kaso a sangsanguenna iti International Criminal Court (ICC).
