LAOAG CITY – Nagpannawagan ni dati a Senador Antonio ‘Sonny’ Trillanes ti pannakaikkat iti pwesto ni Bise Presidente Sara Duterte gapu iti inpakita na iti kallabes iti chamber hearing no sadinno a napagsasaritaan ti naisingasing a badyet ti Office of the Vice President (OVP).
Iti online post, kinuna ni Trillanes a saan laeng a ti panaggasto ti P125 million confidential funds ti impeachable offense ti Bise Presidente.
Innayonna pay ti maipagarup a bribery ken korapsyon a gapu ta nakaawat iti dua a tseke nga aggatad iti 14.4 milion manipud iti dati nga economic adviser ni dati a Presidente Rodrigo Duterte a ni Michael Yang kabayatan ti panagtugawna kas mayor iti Siudad ti Davao.
Maipalagip a bayat ti pannakadengngeg ti naisingasing a badyet ti Office of the Vice President para iti tawen 2025, nagtalinaed a natibker ti takder ni Vice Pres. Sara a saanna a sungbatan dagiti saludsod maipapan iti panaggasto ti opisinana iti P125 milion a kompidensial a pondo iti uneg ti sangapulo ket maysa nga aldaw.
Segun ken ni Duterte, awan ti pakainaigan dagitoy nga alegasion iti diskusion maipapan iti badyet ti Office of the Vice President para iti sumaruno a tawen.
Kabayatanna, sakbay iti daytoy, ket inyebkas met ni Trillanes ti kababalinna maipapan iti pasamak idi laeng Martes, Agosto 27, no sadinno a kinuna ti dati a senador a patienna a panawenen tapno agkakadua dagiti agpanpanday-linteg tapno maikkat iti pwesto ni Duterte.
