LAOAG CITY – Inbatad ni Senate President Vicente “Tito” Sotto III a nakasagana a mangsuporta iti aniaman a plano a mangbaliw ti 1987 Constitution no kasapulan kalpasan ti desisyon ti Korte Suprea nga ideklarar kas unconstitutional ti impeachment kontra ken ni Vice President Sara Duterte.
Segun ken ni Sotto, masapol a maaddaan ti naiget a panagtataripnong dagiti liderato ti kangatoan ken kababaan a pagpandayan linteg iti kongreso kadagiti sumarsaruno a lawas tapno trataren ti isyu.
Inlawlawag na a ti “option three” iti impeachment process ket nabuwangay tapno maiyalisto ti pannakaikkat ti maysa nga impeachable officer a saanna a maar-aramid ti trabaho na wenno makaperwisyo iti pagilian.
Immuna iti daytoy, inrakurak ti Supreme Court en banc a
“denied with finality” ti motion for reconsideration nga inpila ti kamara de representantes tapno baliktaden ti desisyon nga indeklarar nga unconstitutional dagiti articles of impeachment kontra iti bise presidente.
Basar iti korte, ti maikapat nga impeachment complaint a naipasa iti Senado idi Pebrero 5, 2025 ket barred iti babaen ti Article XI, Section 3, Subsection 5 ti Konstitusyon.
Nupay kasta, inpetteng ni Sotto nga arigna binaliwan ti Korte Suprema dagiti pagannurutan iti impeachment.
Inlawlawag na a ti posisyon na ket prinsipyo laeng ken saan a nakabasar iti personalidad ni Duterte.
