LAOAG CITY – Addan iti kustodiar ti Senado ni Sheila Guo, kabsat ti na-dismiss a Mayor ti Bamban, Tarlac a ni Alice Guo.
Naka-hand-cuffed dagiti ima ni Sheila idi simmangpet iti Senado agaraup alas-12:49 ti pangaldaw kaduana dagiti operatiba ti National Bureau of Investigation (NBI).
Dagus daytoy a naipadalan iti medical checkup iti mismo a detention facility ti Senado.
Segun ken ni Senate Sergeant iti Arms Roberto Ancan, mabalin a bisitaen ni Sheila ti legal counsel-na.
Inpasingked ni Ancan nga agbalin a natalged ni Sheila iti ueng ti Senado. Awan ti cellphone ni Sheila ken mabalin nga usaren ti telepono ti Senado tapno makikoordinar iti legal counsel-na.
Agsubli ni Sheila iti Senate detention facility apaman a malpas ti panagdengngeg ita nga aldaw.
Kunana a nakadepende iti komite no kasano kabayag ti panagtalinaed ni Sheila iti Senado.
Mainaig iti daytoy, inpaiman ti National Bureau of Investigation iti Kamara ti pannakakustodiar ken ni Cassandra Li Ong kalpasan ti nairuar a Legislative Warrant of Arrest ken Contempt Order ti Quad Committee kontra ken ni Ong.
Maipalagip a naarestar idiay Singapore da Sheila ken Ong, pannakabagi ti Lucky South 99 Outsourcing Inc. ken Corporate Secretary ti Whirlwind Corporation, Philippine Offshore Gaming Operators.
Kabayatanna, kas business partner ni Alice Guo, mamati ti Quad Committee a maitudo ni Ong dagiti rumbeng nga agsungbat iti operasion ti Philippine Offshore Gaming Operators Lucky South 99 idiay Porac, Pampanga.
