LAOAG CITY – Kinontra ni Sagguniang Panlungsod Member Atty. Jason Perera dagiti sumagmamano a probision a nakailanad ti ordinansa a Safer Cities Initiatives.
Inbatadna a maysa kadagiti nakailanad ket ti panangala ti permit no adda ti pasken a mapasamak kadagiti maibilang nga open area ditoy siudad.
Kunana a saan a rumbeng ti kastoy gapu ta maibilang ti pagilian kas democratic country a rason no apay saan a mabalin a mapawilan dagiti tao wenno mangala nga umuna iti permit sakbay a mangisayangkat ti pasken.
Mainaig iti daytoy, kinontra na pay ti pannakaipawil ti topless wenno awan ti bado ti akin ngato a paset ti bagi ti maysa nga indibidual no mapan iti kalsada.
Inbatadna a naruay dagiti residential area ditoy siudad no sadinno a ti sangoanan da ket kalsada.
Kinunana a no nakaussob ti maysa nga indibidual ket saan a kayatna a sawwen ket criminally liable daytoyen.
Innayonna a pinarebisarna daytoy ken inlimitarna laeng kadagiti asideg ti pagadalan, simbaan, meerkado, centro ti siudad, ken iti city hall.
Kabayatanna, nagyaman ti konsehal gapu ta apaman a kastoy ti nagbalin a kiddawna ket immanamong met ti konseho a marebisar ken mabaliwan ti dadduma a probision ti ordinansa.
