LAOAG CITY – Maam-amak dagiti sumagmamano a mannalon gapu iti maiwaywayat a quarry operation iti Barangay Sulbec iti ili ti Pasuquin.
Segun ken ni Mr. Norman Bulosan, Federated President ti Sulbec Strip Pasuquin Federated Irrigators Association Inc., daytoy ket kalpasan a maapektaran iti pagayusan ti danum iti irigasion a mangsuplay kadagiti kataltalonanda ti nasao a panag-quarry.
Inbatadna nga adda ti pagannurotan iti babaen ti Ilocos Norte Irrigation Management Office a saan a mabalin ti mangiwayat ti panag-quarry iti 1 kilometer radius manipud iti catch dam.
Nupay kasta, inpettengna nga agtultuloy latta ti panag-quarry dagiti tattao nga agtrabtrabaho iti nasao a lugar.
Mainaig iti daytoy, indanonna daytoy nga arungaingda a mannalon iti barangay ken iti National Irrigation Administration tapno masolbaren iti kabiitan a panawen.
Innayonna a dumanon iti sumurok maysa a ribu a mannalon ti posible a maapektaran no agtultuloy iti pannakaiwayat ti quarry operation.
Kabayatanna, bayat a maisursurat daytoy a damag ket nagsardengen dagiti mangiwaywayat ti panag-quarry.
