LAOAG CITY – Naduktalan ti City Social Welfare and Development Office (CSWDO) nga adda dagiti farmacia ditoy ciudad ti Laoag a saan a mangipapaay ti 20 a porsiento a diskwento kadagiti senior citizens.
Gapu iti daytoy, makikoordinar ti CSWDO iti Laoag City General Hospital (LCGH) tapno isu ti papan paggatangan dagiti senior citizens tapno maikkan da ti diskwento.
Inlawlawag ni Mrs. Perlita Cabello, ti mangidadaulo iti CSWDO ditoy ciudad ti Laoag nga adda met dagiti maipaayan ti diskwento ngem limitado laeng.
Kuna na a saan amin a gatangen dagiti maseknan nga agas ket maikkan da ti diskwento.
Innayon na nga adda pay ti aldaw a mabalin laeng a gundawayan dagiti senior citizens ti diskwento a rebbeng na a maited kadakuada.
Inbalakad met ni Vice Mayor Vicentito Lazo kadagiti senior citizens a masapol nga ipakaammo da iti Senior Citizens Office dagiti farmacia a saan a mangipapaay ti diskwento tapno maidanun iti legal office ti gobierno ditoy ciudad ken isuda ti mangipila ti maiyannatop a reklamo kontra kadagiti nasao a pasdek.
