LAOAG CITY – Inpakaammo ni Mrs. Babet Raquiño, ti Presidente ti Chicken Vendors ti Laoag City Public Market and Commercial Complex nga adda ti epekto ti kinabara iti panawen ti suplay ti karne ti manok.
Inlawlawagna a gapu ta adu dagiti manok a matmatay ket isu met ti rason no apay a bumasbassit ti suplayda.
Nupay kasta, inpettengna a nagtalinaed latta ti presio dagitoy iti 190 a pisos iti kada kilo ken awan met ti makitada a panagngatona iti sumarsaruno nga aldaw.
Inbatadna a nangrugi a bimmaba ti suplayda sakbay pay iti pannakangilin ti Semana Santa.
Kunana nga aggapu idiay probinsia ti Pangasinan dagiti ilaklakoda a karne ti manok iti merkado publiko.
Mainaig iti daytoy, kuna ti Presidente ti Chicken Vendors iti merkado publiko ditoy siudad ti Laoag a saan met a bumasbassit dagiti mapan aggatang iti puestoda iti baet ti kinapudot ti paniempo.
Innayonna nga adda ti posibilidad a bumassit ti bagi dagiti manok gapu iti nabara a panawen ngem nakadepende kadagiti poultry farms no kasanoda a taripatoen dagiti mailako babaen ti panangikabilda ti aircondition kadagiti poultry-da.
