LAOAG CITY – Inlawlawag ni Sangguniang Panlungsod Member Handy Lao a saan nga isuda ti nangirakurak a ti pakausaran ti underground ti Laoag City Public Market and Commercial Complex ket maaramid a parking area.
Segun kenkuana, palso a damag ti naiwaras nga impormasion babaen iti nailanad a surat iti sekretario ti konseho.
Gapu iti daytoy, inpalgakna a kitkitaenna dagiti legal nga addang wenno proseso a mabalin a sumaruno nga aramidenna maipanggep iti nasao a banag.
Kunana a sakbay pay a nangrugi ti pannakaiyuswat ti regular session-da ket tinawaganna ti maseknan a sekretario ngem saan daytoy a simmungbat kadagiti tawagna kenkuana.
Mainaig iti daytoy, inbatad ni Konsehal Lao nga inpakaammona daytoy a banag kadagiti kakaduana nga agpanpanday linteg.
Innayonna a dakkel a biddot ti naaramid ti sekretario iti Sangguniang Panlungsod ditoy siudad ti Laoag kadagiti maseknan nga aglaklako iti tiendaan gapu iti palso a damag.
