LAOAG CITY – Naipisuken iti pagbaludan ti suspek a ni James Manera y Pagtacconan, agtawen ti 52, naasawaan, farm owner, taga Barangay Medina iti ili ti Dingras ngem agdama nga agnanaed iti Brgy. Paratong gapu iti pammaltog a napasamak iti uneg ti Maneras Compound iti Sitio Lawis, iti nadakamat met laeng a Barangay iti ili a Paoay.
Daytoy ti kinumpirmaran ni Police Executive Master Sergeant Delfin De Leon ti PNP Paoay.
Segun kenkuana, napilaan ti suspek ti kaso a murder.
Inpakaammo ni Police Executive Master Sergeant De Leon, a desidido dagiti pamilya ti biktima a saan nga agpa-areglo iti suspek.
Maipalagip a napaltugan ti biktima a ni Bernardo Sadang y Obispo, agtawen ti 50, balo ken maysa a retirado a Philippine Army gapu iti saan a masinunuo a rason.
Ti retirado a soldado ket natamaan ti akin-kannigid a paset ti barukong na.
Naitaray ti biktima iti Mariano Marcos Memorial Hospital and Medical Center iti ciudad ti Batac ngem naideklara daytoy a dead on arrival.
