LAOAG CITY – Manamnama nga adda dagiti mailako a ticket kadagiti indibidual a kalikagumna ti makipaset iti Himala sa Buhangin 2024 inton Nobiembre 16.
Daytoy ti inrakurak ni Mr. Xavier Ruiz, Officer In Charge ti Provincial Tourism Office.
Segun kenkuana, sipod idi 2012 a panangrugi ti nasao nga aktibidad ket maiyakar daytoy iti bulan ti Nobiembre gapu ta ti bulan ti Mayo a dati a pannakaiyuswatna ket naobserbaranda a nabara unay ti paniempo ken limitado dagiti aktibidad a mabalin a maaramid.
Inbatadna a napintas ti bulan ti Nobiembre gapu ta isu ti mangipasimudaag ti panangrugi ti holiday season ditoy probinsia.
Kunana a makikoordinarda kadagiti pribado a kompania kas ti SM a tumulong iti Provincial Tourism Office nga agilako ti tickets nangnangruna kadagiti turista wenno dagiti indibidual nga adda iti ruar ti probinsia.
Inlawlawagna a maipanggep iti presio dagiti ticket ket manarimaanda pay laeng nga ipinpinal ngem kunana nga adda ti gold ticket no sadinno a nakaipalaon ditoy ti access ti VIP tents, meal, materials wenno freebies.
Mainaig iti daytoy, naammoan a ti Silver A ket isu ti Standing Area idinto a ti Silver B ket isu ti kalikudan a paset ken daytoy ket libre.
Kuna ni Ruiz a no adda dagiti residente ditoy probinsia a kalikagumna ti gumatang ti Gold ken Silver a ticket ket adda ti diskuentona a maipaay kadakuada a mabalin met a gatangen babaen iti Treasury Office ken Local Finance Office.
Iti agdama, saanda pay a maiparuk-at ti listaan dagiti artist nga ag-perform ngem maipakaammo met laeng daytoy kagiddan ti panangrugi ti panaglakoda ti ticket.
Malaksid iti concert, kunana nga adda pay ti maisayangkat a 4×4 race., beach volleyball, sand boarding, sand castle making, surfing, fire dance ken dadduma pay.
Innayonna a dumanon iti 20 a milyon a pisos ti inlungalongda a pundo ken ni Gov. Matthew Marcos Manotoc pakaseknan iti daytoy.
Kabayatanna, awan ti namnamaenda a dakkel a mapastrek ti Provincial Tourism Office iti panaglako ti ticket gapu ta namnamaenda a ti mapaglakoan ket mausar a pangbayad dagiti magastos iti Himala sa Buhangin 2024.
