LAOAG CITY – Nagpadespensar ti maysa kadagiti kabaknangan a temple iti India kalpasan ti pannakatay ti innem nga indibidual idinto a dinosdosena a sabsabali dagiti nasugatan iti napasamak nga stampede kabayatan ti panagibunong ti ticket para iti festival nga at-atendaran ti ginasut a ribo a tattao iti kada tawen.
Napasamak ti insidente idi rabii ti miyerkules kalpasan ti panagtitipon ti rinibo a tattao iti temple iti ili ti Tirupati iti southern Andhra Pradesh state.
Basar iti report, nagdudupudop ken nagdidinnuron dagiti naruay a tattao kabayatan ti panagibunong ti ticket dagiti agpapaay iti temple.
Mainaig iti daytoy, inpasigurado dagiti opisyal iti nasao nga estado a maipatungpal ti naiget nga imbestigasyon kontra kadagiti empleado iti temple ken siasinno man a maduktalan a responsable iti napasamak ket rumbeng a mapatawan ti maiyannatop a pannusa.
Kabayatanna, inrakurak ni Prime Minister Narendra Modi a nasaktan unay iti napasamak nga insidente ken inpasigurado na a mangipaay ti gobierno ti naan-anay a tulong kadagiti naapektaran.
Ti Tirupati temple iti Andhra Pradesh ket maysa kadagiti kasagradwan a shrine ti Hinduism ken addaan daytoy kadagiti sanikua nga agbalor ti rinibo a bilyon a dolyar a maibilang a maysa kadagiti kabaknangan iti India.
