LAOAG CITY – Kinondenar ni Ukrainian President Volodymyr Zelensky kas terorismo ti Russian drone attack iti pampasahero a tren a nakatayan ti uppat nga indibidual.
Segun ken ni Zelensky, adda ti uppat a tattao ti mapukpukaw kalpasan ti drone strike ti tren nga adda ti nakalugan a sumurok 200 a pasahero iti north-eastern Kharkiv region.
Basar kadagiti opisial iti southern port ti Odesa, adda ti tallo a natay gapu iti nagpatnag a Russian drone attack.
Nupay kasta, saan pay a nangipaay ti aniaman a komento ti Russia no sadinno nga ad-adda pay a pinaigetan ti Moscow kadagiti naglabas a bulan ti drone ken missile strike daytoy a mangtar-target iti enerhia ken imprastraktura ti transportasion ti Ukraine kabayatan a makapaspasar ti pagilian ti nakalamlamiis a paniempo kadagiti naglabas a tawen.
Mainaig iti daytoy, minilyon a tattao iti intero nga Ukraine ti nakapasar iti kinaawan ti heating, kuriente ken danum kalpasan ti panangatake ti Russia.
Maipalagip a nangiwayat ni Russian President Vladimir Putin ti maysa a nalawa a panangatake idi Pebrero 2022 ken manarimaan a konkontrolen ti Moscow ti sumurok-kumurang 20% ti teritorio ti Ukraine.
