LAOAG CITY – Napilaanen ti kaso a robbery dagiti tallo a suspek iti panagtatakaw iti Brgy. 41 Balacad ditoy siudad ti Laoag.
Segun ken ni Police Lieutenant Colonel Andrew Rabang, ti Hepe iti Philippine National Police ditoy siudad, daytoy ket kalpasan a nagtakawda iti maysa a pasdek negosio a dumanon iti 65 a ribu a pisos.
Nabigbig ti biktima nga agtawen ti 44 ken residente iti Barangay Balatong ditoy siudad idinto a dagiti suspek ket agtawen ti 18 a taga Brgy. 54-A, Lagui Sail; agtawen ti 18 nga agnanaed iti Brgy. 40, Balatong ken ti maysa nga adda iti umno a tawen.
Basar iti palawag ti biktima, mangiyuswat koma ti sales inventory idi naduktalanna a ti cash box a naglaon ti agarop 65 a ribu a pisos ket mapukpukaw.
Inbatadna a dagusna a napan kinita ti durabox-na nga ayan dagiti lima a pitakana a naglaon ti sumurok-kumurang lima ribu a pisos ket mapukpukaw met laeng.
Gapu iti daytoy, in-report-na kadagiti otoridad ken dagus met a nangiyuswat dagitoy ti imbestigasion ken kabayatan ti ocular inspection ket nakitada dagiti lima a pitaka nga adda iti pagbasuraan ken awanen ti kargana.
Maipalagip nga idi rineview-da ti closed-circuit television footage a nakaimuntar iti pasdek negosio ken naduktalan nga iti 11:58 ti rabii ti Mayo 28 ket maysa kadagiti suspek ti simrek ken innalana ti nagianan ti kuarta ken dagus a pimmanaw.
Naammoan a nakita pay dagiti otoridad iti footage ti maysa a kadua ti lalaki a simrek a makisarsarita kadagiti tattao nga adda iti pasdek idinto a ti maysa pay ket nagserbi a look out.
Immuna iti daytoy, inpalgak ti biktima a sakbay ti insidente, dua kadagiti suspek ket napan gimmatang ti merienda ken nagtugaw da dagitoy agingga a dimteng ti kadua da nga isu ti simrek iti pasdek.
