LAOAG CITY – Pimmusayen ti nadesgrasya a baro kabayatan a maag-agasan iti Mariano Marcos Memorial Hospital and Medical Center idiay ciudad ti Batac.
Daytoy ket kalpasan a nadesgrasya ti inturongna a motorsiklo idiay Brgy Lang -Ayan, Currimao Ilocos Norte.
Nabigbig daytoy a ni Arcel Gongora y. Dela Cruz, agtawen ti 24, baro, ken residente iti Brgy Camandingan iti ciudad ti Batac.
Immun-una iti daytoy, inbatad ni Police Captain Michael Permison, Chief of Police iti ili ti Currimao, bayat nga agpapa-amyanan a direksyon ti biktima ket naawanan ti preno ti inturongna a motorsiklo a nangitunda ti pannakatinnagna iti kataltalunan.
Gapu iti daytoy, nagsagaba ti biktima ti nakana a sugat iti ulona ken iti nagduduma a paset ti bagina.
