LAOAG CITY – Inpakaammo ni P/Cpt Norman Pentang, Chief of Police iti Dingras Municipal Police Station, nga addan iti nasayaat a kasasaad ti biktima iti napasamak a pammaltog iti Brgy. Medina iti nasao nga ili, idinto nga agtultuloy ti imbestigasion dagiti otoridad iti pakabigbigan ti suspek.
Segun kenkuana, nakasaritan dagiti imbestigador ti biktima a ni Nanette Santos wenno ad-adda nga am-ammo iti nagan a Gugay, agtawen ti 44, negosiante ti buy and sell ti baboy ken residente iti Brgy. Upig, San Ildefonso, Ilocos Sur.
Basar iti pannakisarsarita da iti biktima, immay daytoy ditoy probinsia mainaig iti negosiona a buy and sell ti baboy.
Kunana nga ado dagiti naalan dan footages kadagiti Close Circuit Television camera a naimuntar iti asideg iti nakapasamakan ti pammaltog.
Maipalagip a napaltogan ti maysa a kameng ti Lesbian, Gay, Bisexual, Transgender and Queer wenno LGBTQ Community iti Sitio 6, Brgy. Medina iti ili ti Dingras.
Basar iti Dingras Municipal Police Station, kabayatan a naka-parking ti nagluganan ti biktima a Mitsubishi Montero nga addaan ti plate number a CAK 8470 iti asideg ti maysa nga International Event Center kaduana dagiti tallo nga indibidual nga isuda Mark Vincent Yere, Crystal Ingan, agpada a residente iti Sinait Ilocos Sur ken Arlene Poller, residente iti San Ildefonso, Ilocos Sur ket kellaat nga adda ti immasideg kadakuada a nakamotorsiklo ket ditoy pinaltoganda ti biktima iti naminsan a daras.
Gapu iti daytoy, natamaan iti barukong ti biktima ken dagus a naitaray iti Doña Josefa Edralin Marcos Hospital ngem naiyakar iti Mariano Marcos Memorial Hospital and Medical Center iti siudad ti Batac.
Kabayatanna, narekobre ti maysa a pedaso ti deformed fired bullet ken maysa a pedaso ti empty shell ti Calibre 45.
