LAOAG CITY – Kinumpirmaran ni Dr. Rickson Balalio, ti mangidadaulo iti Provincial Health Office nga umaboten iti uppat nga indibidual dagiti pimmusay ditoy probinsya gapu ti leptospirosis.
Segun kenkuana, ti maysa a nainayun ket manipod iti ili ti Nueva Era.
Kuna na a dagiti pimmusay gapu iti leptospirosis ditoy probinsya ket agpapada a mannalon.
Gapu iti daytoy, inpakaammo na nga agturong ti grupo da kadagiti lugar a nakairekord ti leptospirosis tapno mangipatungpal ti Information Awareness Campaign.
Innayon na nga iti agdama ket addan ti pakabuklan a 33 a kaso ti leptospirosis ditoy probinsya sipud idi Enero agingga ita nga aldaw, Agosto 12.
Mainaig iti daytoy, nagpalagip manen ni Balalio iti publiko a no makarikna kadagiti sintomas ti sakit a leptospirosis kas ti panaggurigor, panag-yellow ti mata ken dadduma pay ket agpakonsultar a dagus iti doktor tapno saan a kumaro ti sitwasyon a mabalin a pakatayan ti pasyente.
