LAOAG CITY – Agtultuloy ti naun-uneg nga imbestigasyon dagiti otoridad mainaig iti engkwentro dagiti pulis ken dua nga armado a lallaki a puon ti nakatayan dagiti suspek iti paset ti Barangay Arua-ay iti ili ti Piddig.
Nabigbig dagiti suspek a da Jayson Mabanag, residente iti Barangay Parut iti ili ti Vintar ken ni Mark Loiue Agtarap de Leon, residente iti Barangay Alejo Malasig iti nadakamat met laeng nga ili.
Segun kenni Police Lt. Tolentino Erum Jr., ti chief of police ti PNP-Piddig, dagiti suspek ket agkabagyan ken dagitoy ti naitudo a suspek iti attempted murder idi Marso 2, 2021.
Binigbig na ti nagbalin a biktima iti daytoy nga insidente a ni Mr. Romulo Bayani, agtawen ti 54, maysa a negosyante ken residente iti Barangay Ab-abut iti ili ti Piddig.
Kunana a ti nasapamak idi Marso 2 ket ginandat a papatayen dagiti suspek ni Bayani ngem saan a nagputok ti paltog.
Rumrumwar a ni Mabanag ket addaan ti maipagarop nga ummuna a kaso na ken maatap a dagiti dua ket miembro ti gun-for-hire.
Mainaig iti daytoy,
Inpetteng ni Mrs. Maribel Doloreyes, ina Jayson a saan a miembro ti gun-for-hire ti anak na.
Segun kenni Doloreyes, nasingpet ti anak na ken awan ti ammo na a madi nga aramid ni Jayson ken saan pay unay a rumrumwar iti pagtaengan da.
Kunana a basar iti asawa ni Jayson, idi kalman ket nagtext ni Mark Loiue Agtarap de Leon iti daytoy ken inawis na nga adda laeng ti papanan da ngem saan na a nadakamat no sadinno a lugar ti pagturungan da.
Inbatad na nga awan met ammo da a pappapanan ni Jayson a sabali a a lugar malaksid laeng iti ili ti Burgos gapo ta daytoy a construction worker ken backhoe operator.
Naulila ni Jayson ti asawa na ket tallo a babbai nga annak na pakairamanan ti innem a bulan a maladaga.
Mainaig iti daytoy, kuna ti kabsat ni Jayson nga awan ti ammo na a sabali nga aramid ti maseknan no diket laeng ti papan da panagtrabaho.
Patien dagitoy a nairamraman laeng ti anak na iti nasao a pasamak.
Kabayatanna, inyistorya ni Mrs. Carina Natividad, ti agtagikua iti tianggi a gimmatang ti arak dagiti dua a suspek a da Mabanag ken de Leon.
Segun kenni Natividad, idi nakagatang dagitoy ket dinamag na kadagiti maseknan no anya ti negosyo da ken ti sungbat dagitoy ket agpapautang da ti kwarta a mairikan.
Inbatad na pay a basar kadagiti dua ket naggapo da iti Pallas gapo ta napan da nagsingir ken adda ti 50 a ribo a pisos a pautang da iti ili ti Solsona.
Kalpasan laeng ti sumagmamano a minutos, napasungadan dagitoy nga adda ti patrol ti pulis ken maipagarop nga inbaga dagiti dua nga agtaray da a nagpalikod rason a nagsubli met dagiti pulis.
Patien ni Natividad a saan a nairanta a mapan iti lugar da dagiti pulis no diket nagpatrolya da laeng ken nakita da a nagtaray dagiti dua a lallaki idi sumangad dagiti otoridad.
Kunana a kalpasan daytoy ket nagkikinnamat dagiti otoridad ken dua a lallaki ken agarop maysa nga oras ket addan ti nangegan a putok ti paltog.
Saan met nga ammo ni Natividad ti napasamak idi Marso 2 ita a tawen no sadinno ket maipagarop a papatayen kuma dagiti dua a lallaki ti manugang na a ni Romulo Bayani.
