Photo Credit/ Virgilio Arimbuyutan
LAOAG CITY – Adda iti kritikal a kondisyon ni Reynante Arimbuyutan kalpasan a tinagbat ti kayong na a ni Joel Cabusi idiay Sitio Lusong, Barangay 29 ditoy ciudad ti Laoag.
Segun iti dati nga asawa ni Cabusi, nasalinan ti 4 a bags ti dara ni Arimbuyutan gapo iti sinagaba na a sugat iti agsinnumbangir a tengnged na, ulo, luppo, tumeng ken dadduma pay a paset ti bagi na.
Mainaig iti daytoy, kunana a datin a naluko ti suspek gapo ta agipangta ken agdangran daytoy kangrunaan na idi damo da ti nagdenna agingga a nagsina da idi 2016.
Inbatad na saan na nga ammo no anya ti makagapo ti riri ti suspek ken ti biktima gapo ta awan ti komunikasyon da iti dati nga asawa na.
Inlawlawag na pay a basar kadagiti annak na ket nakita da ni Cabusi nga agas-asa ti buneng sakbay ti pasamak.
Desidido met daytoy nga agipila ti kaso kontra iti dati nga asawa na.
Kabayatanna, agtultuloy a birbiruken dagiti otoridad ti nasao a suspek a naglibas kalpasan ti panagtagbat.
