LAOAG CITY – Nasakit ti nakem ni Amore Lanot iti pannakatiliw ti live-in partner na a ni Mr. Richard Bustos iti Drug buy-bust operation iti mismo a balayda iti Barangay 16 iti ili ti San Nicolas.
Iti eksklusibo nga interview ti Bombo Radyo Laoag ken ni Lanot, inbatad na nga adda dagiti lallaki a nagdamag kenkuana no adda ti am-ammo na a Bruno.
Segun kenkuana, kalpasan a naibaga na nga am-ammo na ti Bruno ket kellaat lattan a simrek iti balayda dagiti nagsaludsud kenkuana a nakasibilyan a kameng ti pulisya ken pinilit da nga inruwar ti suspek.
Inbatad ni Lanot a sakbay a rimuar dagiti otoridad ket nagsukimat da pay laeng nga immuna iti uneg ti balayda ken pinilit da pay nga innala ti cellphone na.
Innayon ni Lanot a pilpiliten ida dagiti otoridad nga iruwar da laengen ti “items”.
Kabayatanna, inbatad ni Lanot nga uppat a tawen a nabalud ti live-in partner na gapu iti panagikot ken panaglako iti illegal a droga ngem naibasura ti kaso isut gapuna a nawaya-wayaan daytoy.
Kuna na a nagdenna da laeng ken ni Bustos idi nakarwaren iti pagbaludan.
Mamati ni Lanot a mawaya-wayaan to met laeng ti live-in partner na gapu ta agtalek ken mapaneknekan na nga awan iti illegal nga aktibidad na.
Kabayatanna, inbatad ni Police Chief Master Sergeant Harold Nicolas, ti mangidadaulo ti Provincial Drug Enforcement Unit (PDEU) ditoy probinsya nga adda ti transaksyon a napasamak iti nagbaetan dagiti kameng ti pulisya ken ni Bustos
Kuna na a maikontra daytoy iti nagbalin a rakurak ti live-in partner ni Bustos a ni Lanot nga awan ti kinatransaksyon ti suspek.
Inlawlawag ni Nicolas a napasamak ti transaksyon iti gate da Bustos ngem idi tiliwen da daytoy ket nagtaray a napan iti likud ti balayda isut gapuna a kinamat ti maysa a pulis ken sinaruno dagiti kakadwa na.
Innayon na nga idi nakamatan da ket nagresistir a matiliw isut gapuna a naaddaan ti komosyon a nangitunda ti pannakaidaramudom na a nakasugatan ti tumeng na.
Segun kenni Nicolas, nakaruwar laeng iti pagbaludan ni Bustos idi Hulyo 29 ita a tawen ngem iti monitor da ket nagsubli iti illegal nga aktibidad rason nga inoperasyonan da.
Saan met a maibaga ni Nicolas no apay a naibasura ti kaso idi ni Bustos mainaig iti panagikot ken panaglako iti illegal a droga.
Immun-una iti daytoy, nakumpiskar dagiti otoridad ti dua a sachet a naglaon ti maipagarop a shabu ken lima gasut a pisos a nausar iti operasyon.
Iti agdama, maiyur-uray laengen ti resulta ti drug test ni Bustos ken ti pannakaeksamen dagiti naala nga ebidensya kontra kenkuana para iti pannakaipila ti reklamo kontra iti daytoy.
