LAOAG CITY – Agtultuloy ti iwaywayat nga imbestigasyon ti Philippine National Police iti napasamak a pammagkong a nakatayan ti maysa a lalaki idinto a nasugatan dagiti agina iti Barangay Barit ditoy ciudad ti Laoag.
Ti pammagkong ket napasamak iti uneg ti pagnanaedan ni Aiza Rozete iti ndakamat a barangay.
Iti agdama ket nagtalinaed met iti ospital dagiti nasugatan a biktima para iti naan-anay a pannakataming da.
Immunan nga inlawlawag ti pagayam ti maysa kadagiti biktima a timmawag kenkuana tapno agpatulong isut gapuna nga insigida a napan iti lugar.
Kuna na nga idi makadanun iti balay ti pagayam na ket nakita na ti suspek a nakaiggem ti kutsilyo.
Nupay kasta, inbatad ti maseknan nga idi piliten na ti sumrek iti balay ket napan inlock ti suspek kalpasan na ket naglibasen daytoy babaen iti pannagna na iti tawa, ngem natiliw metlaeng daytoy..
Innayon na nga idi makadanun iti balay ket madaman ti komosyon ken adda dagiti dadduma a tattao a nasangpetan na ngem mabuteng da a sumrek.
Mainaig iti daytoy, inpakaammo ti maseknan a saan a daytoy ti damo a napan a nangriribok ti suspek iti balay dagiti biktima, malaksid pay iti panangikabil na ti urea iti pagal-alaan dagiti agina ti danom.
Kabayatanna, inbatad ni Barangay Chairman Benjamin Pudiquet iti Barangay Barit ditoy ciudad ti Laoag a ti suspek ket kalikagom na nga agsinublianan da ken ni Rozete ngem saanen a kayat ti maseknan gapu ta kanayun a dangdangran ti lalaki idi agdendenna da paylaeng.
Agpapan maisursurat daytoy a damag ket awan pay ti inpaay a naan-anay a detalye ti Philippine National Police seknan iti kinatao ti pimmusay a lalaki, ngem rumrumuar a daytoy ket pagayam ni Rozete.
Iti agdama, nagtalinaed ti suspek iti Philippine National Police ditoy ciudad ti Laoag.
