LAOAG CITY – Agpapan ita ket saan pay a nabirukan dagiti tallo a mangalap nga ummunan a nakita idi malem kalman nga agpatpatulong bayat nga adda da iti tengnga ti taaw iti paset ti Barangay Caaoacan ditoy ciudad ti Laoag.
Ummuna iti daytoy, idi alas-singko ti malem kalman ket nakita dagiti residente iti barangay dagiti agpaypayapay nga agpatpatulong a mangalap rason a dagus da nga inreport iti CDRRMO iti panangidaulo ni Dr. Melvin Manuel.
Dagus met a nagresponde dagiti kameng ti CDRRMO ngem gapo iti kinadawel ti dalluyon iti baybay ket timmulong pay iti Coast guard ken nagusar da ti jetski.
Nupay kasta, narigatan pay latta ti jetski rason nga immakar da iti Barangay Lapaz agingga a nakadanon da iti Barangay Gabu Sur.
Idi rabii ket nagdesisyon ti sibubukel a rescue team nga ituloy ita nga aldaw ti operasyon ngem idi timmapog dan ket saan dan a makita wenno mabirukan dagiti mangalap ken gapo iti delikado a sitwasyon ket nagsubli da.
Segun met kenni Petty Officer 1 Roberto Verdadero, Substation Commander Philippine Coastguard iti ili ti Bacarra a pangta iti biag dagiti mangalap ti kinadawel ti dalluyon ngem inpasigurado da kenni Manuel a saan da nga agsardeng agingga a mabirukan da dagiti maseknan.
Kabayatanna, ti teorya ni Manuel ket naperdian dagiti mangalap ken gapo ta nalabbaga ti kolor ti bangka dagitoy ket maipagarop a taga-Curimao dagitoy ngem awan ti naireport iti Mayor ken PNP a mapukpukaw a kailyan da.
First Report: https://www.bomboradyo.com/laoag/tallo-a-mangngalap-naisadsad-iti-kabaybayan-ditoy-siudad-ti-laoag-rescue-team-marigatan-gapu-iti-napigsa-a-dalluyon/
