LAOAG CITY – Napilaanen ti kaso ti subject iti naiwayat nga Anti-Illegal Drug Buy-Bust Operation iti Gaño Hill Resort iti ili ti Sarrat a ni Warren Alcon, agtawen ti 44, naasawaan, construction worker, residente iti Barangay 8 iti nadakamat nga ili gapu iti panaglabsingna iti Republic Act 9165 wenno Comprehensive Dangerous Drugs Act of 2002.
Basar iti Philippine National Police iti ili ti Sarrat, nagpositibo iti drug test ti nasao a suspek ken basar iti pannakaeksamin dagiti nakumpiskar a kontrabando kenkuana ket positibo a shabu dagitoy.
Gapu iti daytoy, nagtalinaed iti kustodiar iti kuerpo ti pulisia ti maseknan nga akusado tapno sangoen ti maiyannatop a pannusa.
Maipalagip a naarestar ti suspek kalpasan a nakumpiskar manipod kenkuana ti 12 a sachet ti maipagarup a shabu, maysa nga one thousand peso bill a nausar kas buy-bust money pakairamanan ti motorsiklona.
Kabayatanna, maibilang kas Street Level Individual ti suspek ken naibalud pay daytoy idi tawen 2014 ken 2023.
