LAOAG CITY – Nabigbigen ti suspek iti panagtatakaw iti maysa a carinderia iti Brgy. 30-B, Sta. Maria ditoy siudad ti Laoag.
Nabigbig daytoy a ni Mr. Kairus James Cruz, agtawen ti 20 ken residente iti Brgy. Cabaroan iti ili ti Piddig ngem agdama nga agnanaed iti Brgy. 19, Sto. Tomas iti ili ti Sarrat.
Daytoy ket babaen iti naala ti Close Circuit Television wenno CCTV camera a naimuntar iti pasdek-negosio.
Gapu iti daytoy, dagus a nakikoordinar ti Laoag City Police Station iti Sarrat Municipal Police Station ken balligi a natiliw ti suspek.
Naammoan a ti nasao a suspek ket isu ti ubing nga adda iti Bahay Pag-asa ditoy siudad ti Laoag a namin-adu a daras a rummuar-sumrek gapu iti panangaramidna kadagiti banag a maikanniwas iti paglintegan.
Kabayatanna, pinalubosan ti City Social Welfare and Development Office ti maseknan nga ubing gapu ta ninamnamada nga agnakem wenno agbalbaliwen daytoy.
Maipalagip a naitaray ti agtatakaw ti maysa nga ipad, maysa a selpon, karton ti sigarilio, kuarta nga agbalor ti tallo a ribu a pisos no sadinno nga adda ti pakabuklan a 30 a ribu a pisos a gatad dagiti natakaw iti maysa a carinderia a kukua ni Mr. Joseph Agullana.
